ROLI I SISTEMVE TË INFORMACIONIT SHËNDETËSORË NË PËRMIRËSIMIN E CILËSISË SË KUJDESIT SHËNDETËSOR NË INSITUCIONET SHËNDETËSORE TË PRIZRENIT DHE SUHAREKËS

Abstract

Në dekadat e fundit, zhvillimet teknologjike kanë transformuar në thelb mënyrën se si organizohet dhe ofrohet kujdesi shëndetësor. Sistemet e Informacionit Shëndetësor (SISH) luajnë një rol gjithnjë e më të rëndësishëm në modernizimin dhe përmirësimin e cilësisë së kujdesit shëndetësor. Ky punim ka për qëllim të analizojë ndikimin e përdorimit të SISH në përmirësimin e shërbimeve shëndetësore, me fokus të veçantë në institucionet shëndetësore të Prizrenit dhe Suharekës. Përmes një qasjeje analitike dhe krahasuese, hulumtimi shqyrton mënyrën se si këto sisteme kontribuojnë në përmirësimin e efikasitetit operacional në këto komuna, saktësinë e të dhënave mjekësore dhe në rritjen e sigurisë dhe kënaqshmërisë së pacientëve. Janë analizuar sfidat dhe përfitimet e implementimit të SISH në kontekstin lokal të këtyre komunave, përfshirë edhe faktorët që ndikojnë në suksesin ose pengesat në përdorimin efektiv të tyre. Megjithëse ka përparime të dukshme, rezultatet sugjerojnë se nevojiten investime të mëtejshme në infrastrukturë, trajnim profesional dhe integrim i plotë të sistemeve për të maksimizuar përfitimet e tyre Ky studim ofron rekomandime konkrete për përmirësimin e mëtejshëm të përdorimit të SISH në institucionet shëndetësore të komunave Prizren dhe Suharekë.