ROLI I RRJETEVE SOCIALE NË NXITJEN E FRIKËS NGA HUMBJA PER PRODUKTIN E CAKTUAR DHE NDIKIMI I SAJ NË VENDIMET PËR BLERJE TË KONSUMATORËVE

Abstract

Rrjetet sociale kanë ndryshuar ndjeshëm mënyrën se si konsumatorët marrin vendime për blerje. Përmes algoritmeve të personalizimit dhe reklamave të targetuara, ato ndikojnë drejtpërdrejt në sjelljen konsumatorë, duke krijuar ndjenja urgjence përmes strategjive të posaçme. Një nga fenomenet më të spikatura në këtë kontekst është FoMo (Fear of Missing Out), që përkufizohet si frika nga humbja e mundësive. Kjo ndjenjë i shtyn individët të marrin vendime të shpejta dhe impulsive, shpesh pa analizuar mirë opsionet. Reklamat e targetuara dhe përmbajtjet që promovojnë oferta të kufizuara apo mundësi ekskluzive luajnë rol kyç në nxitjen e FoMo-s. Një faktor shtesë që e fuqizon këtë efekt është ndikimi i influencuesve, të cilët përmes rekomandimeve të tyre krijojnë presion për përfshirje në trendët e momentit. Si rezultat, konsumatorët përballen me ankth dhe stres, duke ndikuar negativisht në mirëqenien e tyre psikologjike dhe në kënaqësinë pas blerjes. Ndërsa FoMo shfrytëzohet si një mjet i fuqishëm për rritjen e shitjeve, është thelbësore që bizneset ta përdorin atë me përgjegjësi. Shfrytëzimi i tepruar i kësaj strategjie mund të dëmtojë besimin ndaj markës dhe të shkaktojë pasoja afatgjata për konsumatorët. Prandaj, nevojitet një qasje etike, ku përfitimi komercial të mos cenojë shëndetin mendor dhe vendimmarrjen e qetë të konsumatorëve.